Maj Gen Dr Ephrem RURANGWA ni Umugaba w’Ingabo z’u Rwanda zishinzwe Ubuzima. Mbere yo gushyirwa muri uyu mwanya, yari Umuyobozi Mukuru w’Ibitaro bya Gisirikare. Mu bijyanye n’imiyoborere y’ingabo, Maj Gen Dr Ephrem RURANGWA yayoboye Burigade na Diviziyo. Yabaye Umuyobozi w’Ishami rishinzwe Iperereza mu Ngabo z’u Rwanda, Umuyobozi ushinzwe abakozi (Chief J1), Umuyobozi ushinzwe ibikoresho bya gisirikare (Chief J4), Umuyobozi Mukuru ushinzwe Ibikorwa byo Kubungabunga Amahoro; mu bijyanye n’amahugurwa ya gisirikare, yabaye Umuyobozi Wungirije w’Ishuri Rikuru rya Gisirikare i Nyakinama, Umuyobozi w’Ishuri rya Gisirikare rya Nasho ndetse n’Umuyobozi w’Ishuri rikuru rya Gisirikare rya Gako.

Mu zindi nshingano, yabaye Umuyobozi w’Urwego rw’Ubuvuzi muri Gendarmerie Nationale, Umuyobozi Mukuru Wungirije muri Polisi y’u Rwanda, Umugaba Wungirije w’Ingabo zari mu butumwa bw’amahoro bw’Umuryango wa Afurika Yunze Ubumwe muri Darfur.

Maj Gen Dr RURANGWA afite Impamyabumenyi y’icyiciro cya kabiri cya Kaminuza mu Buvuzi Rusange yakuye muri Kaminuza y’u Burundi, Impamyabumenyi y’icyiciro cya gatatu cya kaminuza mu bijyanye n’ubumenyi n’imibanire Mpuzamahanga yakuye muri Kaminuza ya Nairobi.

Yarangije kandi amasomo ya gisirikare mu mashuri makuru ya gisirikare ya Zambia, Afurika y’Epfo na Kenya.

Yitabiriye kandi amahugurwa y’igihe gito atandukanye arimo ayongerera ubumemyi mu gukusanya, gusesengura no gukoresha amakuru y’ubutasi, ayajyanye n’imicungire y’inzego za gisirikare himakazwa demukarasi n’andi anyuranye. Yanitabiriye amahugurwa, inama mpuzamahanga n’ibiganiro byo ku rwego rw’akarere ahagarariye Ingabo z’u Rwanda.

Mu zindi nshingano, Maj Gen Dr RURANGWA ni Umuyobozi mukuru w’Inama y’Ubutegetsi y’Isoko rya Gisirikare, yabaye Umuyobozi Wungirije w’Inama y’Ubutegetsi y’Ikigo cya Gisirikare gishinzwe Ubwishingizi bw’Ubuvuzi, Perezida wa Komite y’amasoko ya Gisirikare, yabaye umwe mu bagize Inama y’Ubutegetsi ya Zigama CSS.