Kigali, 12 Ukuboza 2025

Inama y' Inteko Rusange ya ZIGAMA CSS yateraniye kuri uyu wa gatanu ku cyicaro gikuru cya RDF, Kimihurura, hagamije gusuzuma imikorere  no kwemeza igenamigambi ku bizakorwa mu mwaka wa 2026 ndetse n' igenabikorwa rya 2025–2029, byombi bigamije gukomeza kwimakaza gahunda z’iterambere rirambye rya Koperative ya Zigama CSS.

Inteko Rusange ya CSS ya 41 yayobowe na Minisitiri w’Ingabo,  Juvenal Marizamunda, ari kumwe na Minisitiri w’Umutekano,  Dr Vincent Biruta. Yanitabiriwe n’Umugaba Mukuru w’Ingabo za RDF, abayobozi b’inzego z’umutekano, kimwe n’abandi banyamuryango.

Mu ijambo ry’ikaze, Minisitiri Marizamunda yashimangiye uruhare rukomeye ZIGAMA CSS ikomeje kugira mu guteza imbere imibereho myiza mu nzego z’umutekano.

Brig Gen Cooper Mike Mujuni, Visi Perezida w’Inama y’Ubutegetsi ya ZIGAMA CSS, yagaragaje intambwe umuryango wagezeho mu mwaka ushize anagaragaza icyerekezo cy’Inama y’Ubutegetsi  mu kwagura serivisi no kongera umusaruro.

Iyi nteko Rusange yemeje igenamigambi ry’imikorere y' umwaka wa 2026. ZIGAMA CSS yihaye intego yo kuzongera inyungu  (Net Profit) iteganya kongera kuva kuri miliyari 39.3 ikagera kuri miliyari 42.2 mu mwaka utaha.

Abanyamuryango banemeje imyanzuro itandukanye igamije kwagura gahunda z’imibereho myiza no gukomeza gushimangira imiyoborere myiza. Mu myanzuro y’ingenzi, hemejwe ko hagamijwe kuzamura imibereho y’abanyamuryango.
Inteko Rusange ya ZIGAMA CSS yemeje ko izagabanya inyungu ku nguzanyo zihabwa abasirikare bato, n' abandi  bakozi bo mu nzego z’umutekano bari muri icyo cyiciro.

Inama yitabiriwe n’abanyamuryango ba ZIGAMA CSS baturuka mu nzego zitandukanye z’umutekano zirimo Ingabo z’u Rwanda, Polisi y’u Rwanda, Urwego rw’Igorora, NISS, Urwego rw’Igihugu rw’Ubugenzacyaha, ndetse n’Ikigo cy’Igihugu gishinzwe ubugenzuzi bw'ibimenyetso.