Rubavu,  30 Mutarama 2026

Uyu munsi, Umukuru w’Urwego rwa RDF rushinzwe imibanire hagati y'abasirikare n’abasivile (Chief J9), Col Désiré Migambi Mungamba, yatanze ikiganiro ku baturage bo mu akarere ka Rubavu mu gitaramo cy’Urugendo rw’Ubutwari 2026, cyateguwe mu rwego rwo kwitegura Umunsi w’Intwari z’Igihugu uzizihizwa ku ya 1 Gashyantare 2026.

Iki gitaramo cyateguwe hashingiwe ku nsanganyamatsiko igira iti “Ubutwari n’Ubumwe bw’Abanyarwanda, Inkingi z’Iterambere”, cyitabiriwe n'abaturage, abayobozi b’inzego z’ibanze n'abikorera.

Mu kiganiro yatanze, Col Migambi yagaragaje akamaro k’indangagaciro z’ubutwari, ubumwe, gukunda igihugu, ubunyangamugayo n’ubwitange, agaragaza ko ari zo shingiro ry’ubunyarwanda n’iterambere ry’igihugu.

Yashimangiye ko ubutwari butagarukira ku rugamba gusa, ahubwo bugaragarira no mu nshingano za buri munsi z’umuturage, mu kwitangira abandi no gushyira imbere inyungu rusange.

Col Migambi yanatanze ishusho  y’amateka y’ubutwari mu Rwanda, yibutsa ibihembo  byahabwaga intwari birimo Umudende, Impotore na Gucanirwa uruti nk’ibimenyetso by’ubutwari no gukorera igihugu.

Yagarutse ku bitambo by’intwari z’u Rwanda mu mateka, abihuza n’ibikorwa by'ingabo za RPA byo kugarura ubumwe bw’igihugu, agaciro n’ubusugire bwacyo, no guhagarika Jenoside yakorewe Abatutsi mu 1994.

Guverineri w’Intara y’Iburengerazuba, Jean Bosco Ntibitura, yavuze ko iki gikorwa ari umwanya wo kwibutsa Abanyarwanda ishema bafitiye intwari zabo n’ibitambo zatanze mu rugamba rwo kubohora igihugu no kugarura amahoro.

Yashishikarije abaturage, cyane cyane urubyiruko, gukomeza kurangwa n’indangagaciro z’ubutwari zirimo gukunda igihugu, gukorana umurava n’ubunyangamugayo, ashimangira ko ibimaze kugerwaho n’u Rwanda bigomba kurindwa no kurushaho gutezwa imbere mu nzego zose.