Cabo Delgado,  20 Ukuboza 2025

Maj Gen Vincent Gatama, Umuyobozi mukuru w' Inzego z' Umutekano z' u Rwanda  (RSF) mu Ntara ya Cabo Delgado, uyu munsi yakiriye Brig Gen  Tomás Francisco João Mponha, Umugaba Mukuru wungirije w’Ingabo za Mozambique (FADM), i Mocimboa da Praia.

Uru ruzinduko rwari rugamije gusuzumira hamwe uko umutekano uhagaze mu Ntara ya Cabo Delgado, no kwakira Umugaba Mukuru wungirije w’Ingabo za FADM uherutse kwimura ibiro bye, avuye i Pemba akabijyana i Mocímboa da Praia  ndetse no kongera gushimangira ubufatanye bukomeye buri hagati y’impande zombi mu kurwanya iterabwoba muri iyo ntara.

Mu biganiro byabo, aba bayobozi bombi bibanze ku kongera imikoranire mu bikorwa bya gisirikare no guhanahana amakuru.

Brig Gen Tomás Francisco yashimiye Inzego z' Umutekano z' u Rwanda ku bufasha zikomeje gutanga ku baturage ba Cabo Delgado mu rugamba rwo kurwanya iterabwoba.