Burera,  15 Ukuboza 2025

Uyu munsi, Umuyobozi Mukuru Ushinzwe Ubufatanye bwa Gisirikare n’Abasivili mu Ngabo z’u Rwanda (RDF) (J9), Col Désiré Migambi Mungamba, yagiranye ikiganiro n’abagize Itorero ry’Urungano icyiciro cya VII, rigizwe n’urubyiruko rw’Abanyarwanda baturutse imbere mu gihugu, hirya no hino ku mugabane wa Afurika n' ahandi mu mahanga.

Iyi gahunda y’amasomo y’uburere mboneragihugu izamara iminsi icyenda iri kubera mu Kigo cy’Igihugu cy’Ubutore, i Nkumba, mu Karere ka Burera, kuva tariki ya 12 kuzageza ku ya 20 Ukuboza 2025.

Iyi gahunda ni icyiciro cya karindwi cy’Itorero ry’Urungano, ikaba ihurije hamwe urubyiruko 331.

Col Migambi yatanze ikiganiro gifite insanganyamatsiko igira iti: “Urugamba rwo Kubohora Igihugu n’Uruhare rwa RPA mu Guhagarika Jenoside yakorewe Abatutsi mu 1994.”

Yashishikarije urubyiruko gukoresha neza amahirwe bafite bayabyaza umusaruro mu gutanga umusanzu wabo mu iterambere ry’igihugu, bakarangwa n' indangagaciro zirimo imyitwarire myiza n’izindi ndangagaciro zaranze intwari z’u Rwanda mu rugamba rwo kubohora igihugu.

Yanashimangiye indangagaciro shingiro z’u Rwanda zirimo ubumwe, ubusugire bw’igihugu no gukunda igihugu, agaragaza ko izi ndangagaciro zagize uruhare rukomeye mu gukomeza u Rwanda mbere yuko zisenywa n’ubukoloni.

Yasoje asaba urubyiruko gukunda igihugu cyabo no kwitegura kuba abayobozi b’ejo hazaza bafite  ubwitange n’icyerekezo, baharanira iterambere ry’u Rwanda.