Umuyobozi Mukuru ushinzwe ubufatanye bw'ingabo n’abaturage (J9) mu Ngabo z’u Rwanda, Col Désiré Migambi Mungamba, yatanze ikiganiro ku banyeshuri bo mu Ishuri Rikuru ry' imyuga n' ubumenyingiro rya Tumba  abashishikariza gukoresha ubumenyi bwabo mu ikoranabuhanga mu guteza imbere igihugu.

Iki kiganiro cyateguwe mu rwego rw’ibikorwa byo kwizihiza Umunsi w’Intwari z’Igihugu wizihijwe ku ya 1 Gashyantare 2026 ku rwego rw’igihugu hose.

Insanganyamatsiko igira iti: “Ubutwari n’Ubumwe bw’Abanyarwanda: Inkingi z’iterambere,” igamije kwimakaza indangagaciro zijyanye n’ubutwari zirimo gukunda igihugu, ubumwe n’inshingano mu rubyiruko.

Mu kiganiro cye, Col Migambi yagaragaje akamaro k’indangagaciro nyarwanda zirimo ubumwe, amahoro, ubusugire bw' igihugu n’iterambere, ashimangira ko izi ndangagaciro ari zo zatumye igihugu kigira imbaraga n’ubudahangarwa mu bihe bitandukanye by’amateka yacyo.

Yifashishije urugero rw’ubutwari bw’Ingabo za RPA mu rugamba rwo kubohora igihugu, yasabye abanyeshuri kubwigiraho no kurangwa n’umuhate no kwitangira igihugu.

Yakomeje asaba abanyeshuri gukoresha ubumenyi bafite mu ikoranabuhanga mu guteza imbere igihugu no kurwanya ingengabitekerezo ya Jenoside, cyane cyane ku mbuga nkoranyambaga.

Yanabibukije kwirinda ibikorwa byose byahungabanya umutekano w’igihugu, abasaba gukomeza kurangwa n’ubudahemuka, inshingano no kugira uruhare rugaragara mu kurinda isura nziza n’umutekano by’u Rwanda.

Mu ijambo rye, Eng. Rita Clemence Mutabazi, Umuyobozi w' Ishuri Rikuru ry'imyuga n' ubumenyingiro rya Tumba , yibukije abanyeshuri ko ubutwari ari umusingi w’umuco nyarwanda, abasaba guhora bakura isomo ku ntwari z’u Rwanda no kuzifata nk’icyitegererezo mu buzima bwa buri munsi no mu mwuga wabo w’ahazaza.