Huye,  19 Ukuboza 2025

Umuyobozi Mukuru ushinzwe imikoranire y'abasivile n'abasirikare mu Ngabo z’u Rwanda, Colonel Désiré Migambi Mungamba, kuri uyu wa gatanu yagiranye ikiganiro n’urubyiruko rw'abahungu n’abakobwa 477 bafite imyaka iri hagati ya 15 na 17, bitabiriye Icyumweru cy’Impano z’Imikino ku rwego rw’igihugu (Isonga National Sports Talent Week), cyateguwe kuva tariki ya 16 kuzageza ku ya 22 Ukuboza 2025.

Iki gikorwa kigamije kurera no kumenya impano z’imikino zigaragaza hirya no hino mu gihugu.

Iri ni itegurwa rya kabiri ry’iyi gahunda y’imikino ku rwego rw’igihugu, rikorwa mu mashuri yatoranyijwe yakira abanyeshuri bacumbikirwa muri buri karere, mu gihe ikigo nyamukuru cy’igihugu giherereye kuri Groupe Scolaire Officiel de Butare mu Karere ka Huye.

Iyi gahunda igamije gutanga urubuga mu guteza imbere impano binyuze mu myitozo ihanitse, amarushanwa, no kumenyekanisha impano ku rwego rw’igihugu.

Iki gikorwa cyabaye gifite insanganyamatsiko igira iti “Umurage w’Urubyiruko mu Kurinda no Kubohora Igihugu,” kiribanda ku kumenya impano mu gihugu hose, gushyiraho amahugurwa ahuriweho ku rwego rw’uturere, no kongerera ubumenyi n’ubushobozi abarimu b’imikino n’abatoza bo mu nzego z’ibanze.

Mu ijambo rye, Colonel Migambi Mugamba yibukije abakinnyi amateka y’u Rwanda, by’umwihariko urugamba rwo kubohora igihugu rwasubije u Rwanda icyubahiro, ubumwe n’ubusugire bwarwo. Yashimangiye uruhare rukomeye rw’urubyiruko mu kurinda ibyo igihugu kimaze kugeraho binyuze mu rugamba rwo kubohora no mu gusigasira ubusugire bwacyo.

Yakomeje asaba abo bakinnyi bato guharanira indangagaciro z’u Rwanda mu rugendo rwabo rw’imikino, zirimo ubunyangamugayo, umurava, imyitwarire myiza, gukunda igihugu no kugihesha isura nziza.

Yanashimangiye ko imyitwarire myiza igomba kubaranga mu byo bakora byose, abashishikariza kuba intumwa nziza z’u Rwanda igihe cyose bazaba bahagarariye igihugu mu marushanwa yo mu gihugu no ku rwego mpuzamahanga.