MUSANZE, 6 UGUSHYINGO 2025

Umugaba Mukuru w’Ingabo za Kenya (CDF-KDF), Gen Charles Muriu Kahariri uri mu ruzinduko mu Rwanda,  uyu munsi yasuye Ishuri Rikuru rya Gisirikare rya RDF riherereye i Nyakinama, mu Karere ka Musanze. Gen Kahariri yatanze ikiganiro ku nsanganyamatsiko igira iti “Gushyira mu mwanya ukwiye Afurika mu ruhando rw’amahanga: Uruhare rw’Ingabo mu mutekano n’iterambere rya Afurika mu gihe cy’imihindagurikire n’imiyoborere mu Isi.”

Akimara kugera mu Ishuri Rikuru rya Gisirikare , Gen Kahariri n’itsinda bari kumwe bakiriwe n’Umugaba Mukuru w’Ingabo zirwanira ku butaka, Maj Gen Vincent Nyakarundi, ari kumwe n’Umuyobozi w’Ishuri Rikuru rya Gisirikare rya RDF, Brig Gen Andrew Nyamvumba, hamwe n’abayobozi b’icyo kigo.

Yasobanuriwe icyerekezo n’intego z’ishuri aribyo gutoza abayobozi b’Ingabo z’u Rwanda n’abaturuka mu bihugu by’inshuti bagahabwa ubumenyi buhanitse n’ubushobozi bwo gutekereza mu buryo bwagutse mu gukemura ibibazo by’umutekano.
.
Mu kiganiro cye, Gen Kahariri yagarutse ku mwanya Afurika ifite mu Isi irangwa n’ihindagurika ry’ububasha bw’ibihugu bikomeye, guhirimbanira ubuhangange, n’ibibazo by’ umutekano muke bigenda byigaragaza.

Yasabye abasirikare bakuru gufata uburyo Afurika ihagaze mu ruhando rw’Isi  nk’amahirwe  asaba guhuza imbaraga za dipolomasi, ubukungu,  igisirikare no kumenya amakuru mu kugera ku mahoro arambye n’iterambere.

Umugaba Mukuru w’Ingabo za Kenya yakomeje asobanura akamaro k’ubufatanye n’ubumwe mu gukemura ibibazo bya Afurika by’umutekano n’iterambere. Yavuze ko guhuza ibikorwa n’ingamba zo gukemura ibibazo hagati y’inzego ari ngombwa, kandi ko igisirikare gifite inshingano z’ingenzi mu kubihuza kugira ngo habeho igisubizo ku bibazo bikomeye by’umutekano.

Yasabye abasirikare bakuru,
nk’abategerejweho kuba abayobozi b’ingabo mu gihe kizaza, kugira ubushobozi bwo gutekereza no kureba kure mu gufata ibyemezo.

Mu kugaragaza uruhare rw’igisirikare mu gihe cya none, Gen Kahariri yabwiye abasirikare bakuru ko ingabo za Afurika zitatekerezwa mu ndorerwamo y’intamabara, ahubwo nk’imbaraga zituma habaho impinduka mu bihugu no mu karere. Yagaragaje akamaro ko kurinda ubusugire bw’ibihugu, guteza imbere ubumwe bw’akarere, no kugira uruhare mu iterambere ry’ibihugu binyuze mu guhanga ibishya, n’itumanaho rinoze.

Ku basirikare bakuru bari mu mahugurwa, iki kiganiro cyabaye umwanya wo kwiyungura ubumenyi no guhuza imitekerereze yabo n’imiterere y’Isi n’umugabane muri rusange. Wabaye umwanya wo gutekereza ku gisirikare nk’urwego rudaharanira umutekano gusa, ahubwo nk’imbaraga z’iterambere rya Afurika.