Kigali, 31 Mutarama 2026

Irushanwa ry'imikino 2025-2026 rihuza amakipe yo mu Ngabo z'u Rwanda (RDF ) ryarangiye kuri uyu munsi, risozwa n’imikino ya nyuma y'umupira w'amaguru  ishimishije yabereye kuri Sitade Pele, i Kigali.

Mu bagabo, umukino wa nyuma wahuje Republican Guard (RG) na Special Operations Force (SOF), naho mu bagore  abacakiranye ku mukino wa nyuma ni  Military Police (MP) n’Ingabo zirwanira mu Kirere (RAF).

Iri rushanwa ryabaye mu rwego rw’ibikorwa byo kwizihiza Umunsi w’Intwari z’Igihugu uzizihizwa ku ya 1 Gashyantare 2026.

Mu cyiciro cy’abagabo, RG yegukanye igikombe itsinze SOF 1–0. Mu bagore, MP yatsinze Ingabo zirwanira mu Kirere 3–2 .

Iki gikorwa cyo gusoza imikino cyitabiriwe na Minisitiri w’Ingabo, Juvenal Marizamunda, wari Umushyitsi Mukuru, Umunyamabanga wa Leta muri Minisiteri ya Siporo, Rwego Ngarambe, hamwe n’Umugaba Mukuru w’Ingabo z’u Rwanda, Gen. M.K. Mubarakh.

Hari kandi abandi bayobozi batandukanye ba Leta, abajenerali ba RDF, abayobozi bakuru n’abandi basirikare, hamwe n' abagize izindi nzego z’umutekano, abahagarariye umupira w’amaguru mu Rwanda, ndetse n’abaturage.

Abitabiriye banasusurukijwe n’imyidagaduro bagejejweho n’abahanzi Maria Yohana na Muyango Mitari, mu rwego rwo kwizihiza Umunsi w’Intwari.

Mu ijambo rye, Minisitiri w' Ingabo Juvenal Marizamunda yashimangiye akamaro k’irushanwa ry' imikino muri RDF, agaragaza ko rigira uruhare mu kubaka ubuzima bwiza ku basirikare , ubumwe, gusabana no kuzamura morale, ndetse no kubaka umutima w' ubutsinzi mu Ngabo z’u Rwanda.

Irushanwa ry'imikino rihuza imitwe itandukanye y’ingabo z'u Rwanda,  ryatangiye  mu kwezi k' Ukuboza 2025, rihuza abagabo n’abagore mu mikino itandukanye irimo umupira w’amaguru, basketball, volleyball, handball, netball,  athletism, no kurasa.

Abegukanye intsinzi mu yindi mikino:

Basketball: RMA – GAKO

Volleyball:RG

Handball:SOF

Netball:MP BDE

Kurasa:BMTC – NASHO

Umurashi mwiza kurusha abandi: Sgt Kayihura Kennedy

Umurashi mwiza ukoresheje pistolet : Sgt Kayihura Kennedy

Athletism 5000m:Mu bagabo — Sgt Tuyishime Christophe; Mu bagore — Pte Nyiransabimana Ciliane

3000m: Mu bagabo, Ssgt Sebahire Eric
Mu bagore, Pte Akarabo Josiane

100m: Mu bagabo, Pte Asifiwe Geoffrey 
Mu bagore, Officer Cadet Umuhoza Martine.