Abanyeshuri biga mu Ishuri Rikuru rya Gisirikare i Musanze, batangiye urugendoshuri rw’iminsi itanu mu gihugu.

Uru rugendo rushingiye ku nsanganyamatsiko igira iti: “Gusesengura uruhare rwa politiki y’u Rwanda ku bidukikije n’imihindagurikire y’ikirere mu kugera ku mutekano n’iterambere birambye.”

Urugendo rwatangijwe n’ikiganiro cyo ku rwego rwo hejuru cyatanzwe na Minisitiri w’Ibidukikije, Dr Bernadette Arakwiye, ku cyicaro cya Minisiteri y’Ingabo giherereye i Kimihurura.

Muri icyo kiganiro, Minisitiri yatanze ishusho rusange y’ingamba z’igihugu zigamije kurengera ibidukikije no guhangana n’imihindagurikire y’ikirere, agaragaza uruhare rukomeye rw'ingamba za politiki  mu guteza imbere ibidukikije.

Uru rugendoshuri ni kimwe mu bice by’ingenzi bigize integanyanyigisho z’Ishuri Rikuru rya Gisirikare (RDFCSC), rugamije kugera ku ntego nyamukuru y’iri shuri yo gutegura abasirikare bafite ubumenyi bwimbitse ku byerekeye politiki z’igihugu, imiyoborere, n’ingaruka zabyo ku mutekano.

Binyuze muri iyi gahunda, abanyeshuri bahabwa amahirwe yo gukora ubushakashatsi ku bibazo by’ingenzi by’igihugu, bigatuma bahuza ubumenyi bw’amasomo n’ubunararibonye bwo mu buzima busanzwe.

Kwibanda kuri politiki y’ibidukikije n’imihindagurikire y’ikirere muri uyu mwaka bigaragaza uko ikibazo cy’imihindagurikire y’ikirere kirushaho gufatwa nk’ingenzi mu kugira uruhare ku mutekano urambye n' iterambere ry’igihugu n’akarere muri rusange.