Uyu munsi, Itsinda ry'Abahanga mu by'ubwubatsi ry’Ingabo z’u Rwanda  (RDF) riri muri Jamaica rifatanyije n’Abahanga mu by'ubwubatsi bo mu Ngabo za Jamaica (JDF), bakoze Umuganda ku Kigo cya Blessed Assurance. Iki kigo cyita ku bana bafite ubumuga, kibifashijwemo n’Imiryango ya Mustered Seed. Iki gikorwa kiri mu bikorwa bikomeje byo gufasha gusana no kuzahura ibyangijwe n’inkubi y’umuyaga yiswe Hurricane Melissa, hagamijwe gufasha abaturage bugarijwe n’ibibazo no gusubiza ku murongo ibikorwa remezo by’ingenzi.

Iki gikorwa cyakozwe ku bufatanye n’Ibitaro bya Kaminuza ya West Indies, ishami rya Tony Thwaites, hagamijwe kunoza imibereho n’imyigire by’abana bo ku Kigo cya Blessed Assurance. Mu mirimo yakozwe harimo gusiga irangi inzu y’ishuri no gushyira ibikoresho bitanga akayaga mu byumba byo kuraramo.

Iki gikorwa kigaragaza umwuka w’ubufatanye hagati ya RDF na JDF, ndetse n’ubushake bahuriyeho mu kubaka ubushobozi bw’abaturage no gutanga ubufasha bw’ubutabazi.

Ubu bufasha bwahinduye isura y’ikigo ku buryo bugaragara kandi bugira uruhare rufatika mu kuzamura imibereho myiza y’abana n’abakozi b'icyo kigo.

Mu ijambo rye muri iki  gikorwa, Col Moses Kayigamba, Umuyobozi w’Itsinda ry’Abahanga mu by'ubwubatsi rya RDF, yashimiye abitabiriye bose ubwitange no gukorera hamwe bibaranga. Yasobanuriye abari aho muri make inkomoko y’Umuganda, wemejwe nk’imwe mu ngamba zishingiye ku kwishakamo ibisubizo by’u Rwanda hagamijwe guteza imbere ubumwe, ubufatanye n’inshingano rusange. Yagaragaje ko Umuganda ukorwa nk'itegeko ku wa Gatandatu wa nyuma wa buri kwezi. Yongeyeho ko kuzana uyu muco wo kwitangira abandi muri Jamaica bikomeza gushimangira umubano n’ubunararibonye bahuriyeho, bigirira akamaro abaturage bakorera.

Bwana Dalmas Agan, Umuyobozi w’Ikigo cya Blessed Assurance Children’s Home, na we yashimiye byimazeyo Itsinda ry'Abahanga mu by'ubwubatsi ba RDF na JDF ku bufasha budasanzwe batanze. Yashimye umutima mwiza n'umurava by’aya matsinda, avuga ko abana bagiye kubaho no kwiga mu buryo bwiza kurushaho kubera iki gikorwa cyuje umutima w’urukundo. Yavuze ko iki gikorwa ari ikimenyetso nyacyo cy’impuhwe n’ubufatanye, kandi ko cyagize uruhare rugaragara mu guhindura ubuzima bw’abana barererwa muri iki kigo.